Հայ-հունական համագործակցություն

Երևանի Մխիթար Հերացու անվան պետական բժշկական համալսարանում  2013 թ-ին փետրվարի 26 – ին տեղի ունեցավ աշխարհահռչակ գիտնական, բջջաբան, արգանդի վզիկի քաղցկեղի սկրինինգի հիմնադիր Գեորգիոս Պապանիկոլաուին նվիրված գիտաժողով:

Գեորգիոս Պապանիկոլաուն 1904թ.- ին ավարտել է Աթենքի  Կապոդիստրիայի անվան բժշկական համալսարանը, այնուհետև կրթությունը շարունակել է Մյունխենի համալսարանում, որտեղ սկսել է զբաղվել արգանդի վզիկի քաղցկեղի սկրինինգի հետազոտություններով:

1910թ.-ին Մյունխենի համալսարանում  Պապանիկոլաուն ստացավ դոկտորի աստիճան. հետագայում աշխատելով նաև Յենի և Ֆրայբուրի համալսարաններում:

1923թ.-ին նա կատարեց իր`առաջին արգանդի վզիկի քաղցկեղի սկրինիգի հետազոտությունները:

1947թ.-ին Գ. Պապանիկոլաուն դարձավ Կորնելի համալսարանի անատոմիայի և բջջաբանության պրոֆեսոր:

1954թ.-ին նա հրատարակեց իր հիմնարար աշխատությունը  «Atlas of Exfoliative Cytology», որը բժշկագիտության համար մեծ ներդրում էր:

Գիտաժողովը տեղի էր ունենում  ՀՀ Առողջապահության նախարարության , Հայաստանում Հունաստանի  դեսպանության հովանու ներքո: Գիտաժողովին ներկա էին  Հունաստանի դեսպանը` Իոաննիս Տայիսը, Մեծ Բրիտանիայի և Միացյալ Թագավորության արտակարգ և լիազոր դեսպան Պ. Ալեսը, Բուլղարիայի Հանրապետության դեսպան  Պ. Կարաստանատովը և  ՀՀ արտաքին գործերի նախարարության  ՅՈՒՆԵՍԿՕ- ի բաժնի վարիչը` Պ. Մկրտչյանը:

Բացման խոսքով հանդես եկավ  Երևանի Մխիթար Հերացու անվան պետական բժշկական համալսարանի ռեկտոր, բ.գ.դ պրոֆեսոր Միքայել Նարիմանյանը: Պարոն Նարիմանյանը, ողջունելով ներկաներին , ներկայացրեց  Գեորգիոս Պապանիկոլաուի աշխատությունները` նշելով, թե որքան մեծ դեր են դրանք ունեցել բժշկության մեջ և որքան մարդկանց կյանք են փրկել, շեշտը դնելով նրա`«Արգանդի վզիկի քաղցկեղի սկրինինգի» հետազոտության վրա, որը բժշկագիտության մեջ հիմք դարձավ նոր պրակտիկայի  և մասնագիտության կիրառման գործում:

Ողջույնի խոսքով հանդես եկան  Հայաստանի Հանրապետությունում Հունաստանի  արտակարգ և լիազոր դեսպան  Իոաննիս Տայիսը և արտաքին գործերի նախարարության  Յունեսկօ-ի բաժնի վարիչ Պարոն Մկրտչյանը, ովքեր շնորհակալություն հայտնեցին  բժշկական համալսարանին` ջերմ ընդունելության համար: Այնուհետև նրանք հաջողություն մաղթեցին գիտաժողովի մասնակիցներին` հույս հայտնելով, որ նրանց ելույթներով նրանք կնպաստեն մեծանուն բժիշկ Պապանիկոլաուսի , նրա «Պապ» թեսթի և այդ բնագավառում իրականացվող ուսումնասիրությունների շուրջ մասնագիտական գիտելիքների հարստացմանը:

«Արգանդի պարանոցի քաղցկեղի , նախաքաղցկեղային և այլ հիվանդությունների մանրադիտակային ախտորոշման հիմունքները և մեթոդները» թեմայով բացեց գիտական զեկուցումների շարքը «Մուրացան» հիվանդանոցային համալիրի, կլինիկական  պաթոլոգիայի  լաբարատորիայի ղեկավար Արմեն Մխիթարյանը:

Զեկուցումներով ելույթ ունեցան  ԵՊԲՀ ուռուցքաբանության ամբիոնի դոցենտ, «Շենգավիթ» բկ-ի օնկոգինեկոլոգիայի բաժնի ղեկավար, գիտության գծով փոխտնօրեն  Արտեմ Ստեփանյանը, ով վիրահատության տեսահոլովակներով ներկայացրեց արգանդի քաղցկեղի վիրահատության ընթացքը, և ԵՊԲՀ ուռուցքաբանության ամբիոնի ասիստենտ, «Մուրացան»  հ/հ օնկոհոեմատոլոգիայի բաժնի բժիշկ- ուռուցքաբան Դավիթ Զոհրաբյանը` անդրադառնալով «Արգանդի պարանոցի քաղցկեղի և նախաքաղցկեղային հիվանդությունների բուժման մոտեցումներին»:

Հարցեր, պատասխաններ, մեկնաբանություններ